भीमेश्वरको पौरख : “पदमार्ग निर्माण, नगरको गौरव”

  • प्रकाशित मिति : February 13, 2021
  • कुमार अेाझा

दोलखा । मुलुकको नयाँ संरचना अनुसार वनेका स्थानीय तहमा लामो समयपछि जनप्रतिनिधि आएसँगै विकास निमार्णका कामले पनि प्राथमिकता पाउन थालेका छन् । जनप्रतिनिधि निर्वाचित भएपछि स्थानीय तहहरुमा सडक, खानेपानी, विजुली, स्थास्थ्य, शिक्षा, स्वरोजगार तथा अन्य थुप्रै कामले तिव्रता पाइरहेका छन् ।

 

विभिन्न स्थानीय तहले संघीय तथा प्रदेश सरकारको सहकार्य र आफ्नै प्रयासमा समेत थुप्रै नयाँ र नागरिक लक्षित कामलाई अगाडि वढाइरहेको वेला दोलखाको भीमेश्वर नगरपालिकाले पनि स्वदेशी तथा विदेशी पर्यटकलाई सहज हुने गरि पदमार्ग निमार्ण गरेको छ । पर्यटकीय क्षेत्रको विकाससँगै पर्यटकलाई सहज ढंगले पदयात्रा गराउनका लागि नगरपालिकाले यस्तो काम सुरु गरेको हो ।

प्रधानमन्त्री स्वरोजगार कार्यक्रमअन्तर्गत दोलखाको भीमेश्वर नगरपालिकाले पर्यटकलाई लक्षित गरी पदमार्ग निर्माण गरेको छ । प्रधानमन्त्री रोजगार कार्यक्रमअन्तर्गत बेरोजगारको पहिचान गरि नगरपालिकाले वडा नं २ र ४ मा पदमार्ग निर्माण गरेको हो ।

नगरपालिकालको वडा नं २ को मञ्जुश्री उद्यानदेखि भ्यूटावरसम्म र वडा नं ४ जिलुको वृन्दावनदेखि साहित्य उद्यानसम्म आकर्षक पदमार्ग निर्माणको काम भइरहेको छ । वडा नं २ को मञ्जुश्री उद्यानदेखि वडा नं ६ को भ्यूटावरसम्म करिब रु ३१ लाखको लागतमा दुई किलोमिटर पदमार्ग निर्माण गर्न लागिएको र करिब तीन हजार ६०० सिँढी निर्माण गर्ने योजनाका साथ काम भइरहेको भीमेश्वर नगरपालिकाका रोजगार संयोजक डम्बरप्रसाद ओलीले बताए ।

संयोजक ओलीका अनुसार वडा नं ४ को बृन्दावनमा रु २० लाख ६८ हजारको लागतमा एक हजार ८०० मिटरको पदमार्ग निर्माणको काम धमाधम भइरहेको छ । भीमेश्वर नगरपालिकाले बेरोजगार सूचीमा आवेदन गरेकाहरुको पहिचान गरी आवश्यकताअनुसार विभिन्न विकास निर्माणको काममा परिचालन गरेको हो ।

भीमेश्वर नगरपालिकाले नगरवासीको गौरवको आयोजनासँगै पर्यटन प्रवद्र्धन तथा जीविकोपार्जनलाई समेत विशेष महत्वका साथ हेरिएको र समग्र क्षेत्रमा विकास गराउने उद्देश्यले काम गरिरहेको नगरपालिकाका प्रवक्ता हरिवंश चौलागाईँले बताए । नगरपालिकाले पर्यटकलाई लक्ष्य गरी विभिन्न क्षेत्रमा उद्यान, पोखरी, भ्यूटावरको निर्माण गरिसकेको र पर्यटकीयस्थलको पहिचान गरी पूर्वाधार विकासका काम गरिरहेको प्रवक्ता चौलागाईँले बताए ।

सांस्कृतिक धार्मिक प्राकृतिकरूपमा विभिन्न ठाउँमा नगरपालिकाले निर्माण गरेको पर्यटकीय क्षेत्रहरुमा पुग्न तथा पर्यटन प्रवद्र्धनका लागि पदमार्ग महत्वपूर्ण मार्गको रूपमा हेरिएको छ । नगरपालिकाले बेरोजगारको पहिचान गरी रोजगार दिएर आफूलाई विकास निर्माणका काममा लगाएको वडा नं ४ का तिलकप्रसाद सापकोटाले खुशी व्यक्त गरे । पदमार्ग निर्माण सम्पन्न भएसँगै बृन्दावन, महाँकाल मन्दिर, जलेश्वर मन्दिर, एकीकृत नमूना बस्तीलगायत धार्मिक तथा पर्यटकीयस्थलको अवलोकन गर्न सकिन्छ ।

भीमेश्वर नगरपालिकामा १६ वर्षदेखि ४० वर्ष उमेर समूहका तीन हजार ५६६ जना प्रधानमन्त्री स्वरोजगार कार्यक्रममा सूचीकृत भएका छन् । रोजगारीका लागि एक हजार ७६१ पुरुष र एक हजार ८०३ महिला रोजगार कार्यक्रममा सूचीकृत भएको रोजगार संयोजक ओलीले बताए । रोजगार कार्यक्रमा सूचीकृत भएकामध्ये वडा नं २ र ४ का पदमार्ग निर्माण गर्न लागेको र अन्य वडामा त्यस्तै निर्माणको काममा लगाउने तयारी भइरहेको छ ।

प्रधानमन्त्री रोजगार कार्यक्रममा सूचीकृत भएकाहरूले कम्तीमा १०० दिनको रोजगारी पाउने व्यवस्था रहेको छ । बेरोजगार रहेकालाई विकास निर्माणको काम लगाउने र भुक्तानी गरिने हुँदा ग्रामीण क्षेत्रमा यो कार्यक्रम निकै लोकप्रिय बन्दै गएको छ । ज्याला मजदुरीमा काम गर्दा सम्मान काममासमेत महिला पुरुषको बीच ज्यालामा विभेद भइरहेको अवस्थामा यो कार्यक्रममले सम्मान ज्याला वितरणले थप लोकप्रिय बनेको छ ।