राष्ट्रियता

  • प्रकाशित मिति : November 20, 2020
  • sajhamail.com

– दिनेश अधिकारी

उनीहरुले मसङ्गबाट
मेरो
कछाड खोसे
लँगौटी लुटे
र, रबाफिलो जिब्रो फड्काएर
बेसरी अर्थ्याएः
राष्ट्रियता !
सम्पत्तिभन्दा प्रिय
र, मायाभन्दा मूल्यवान हुन्छ
हामीले यसको मर्यादा बढाउनु पर्छ
थपे–
खै ! टोपी पहिरेको ?
खै ! दौरा-सुरुवालमा डटेको ?
आफ्नो साँचो परिचय भनेको राष्ट्रियता हो
राष्ट्रियता !
आँखाको नानीभन्दा प्यारो हुन्छ…
ला ! भनेर दिन
उनीहरुको हात
बलिको पर्याय हुन सकेन
जोरूँ न त भन्दा
जो, आफूसँग थियो–
शरीरको मयल
कपडाको सट्टामा प्रयोग हुन सक्ने सम्भावनै थिएन
म-
सुनिरहेँ
हेरिरहेँ
पर्खिरहेँ
गाउँदै/सुसेल्दै–
राष्ट्रियता आमाको काखभन्दा प्यारो हुन्छ
उनीहरु–
मलाई निर्वस्त्र छोडेर गए !!

(धर्तीको गीत, कवितासङ्ग्रह) २०४४, साझा प्रकाशनबाट प्रकाशित